Tími á blogg

Mér hlær hugur í brjósti hugsandi um framsókn hangandi á þingsflokks herberginu sínu í Alþingishúsinu eins og hundur á roði Litlu skinnin eiga svo bágt núna Völdin eru góð en það er kannski ekki eins gott að missa þau.

Svo hafa ýmsar áhugaverðar pælingar skotið upp kollinum, því miður ekki þess eðlis að ég vilji deila þeim hér en ég hef nóg um að hugsa samt. Á trúargöngunni skjóta upp við og við leyndardómar sem ekki opnast strax og kannski ekki einu sinni á þann hátt að maður átti sig. Ég fékk smá staðfestingu séð frá augum þess sem ekki trúir en er samt nógu opin til að hafna ekki þeim möguleika að þetta sé kannski hægt, að ég stend föstum fótum í trúnni.

Það er vel skiljanlegt að þetta sé fjarlægur heimur þeim sem ekki trúa. Ekki vil ég troða þeim um tær og ætlast til þess sama. Það má margt segja um þá sem vilja með ákveðnum hætti koma því á framfæri að þeir séu ekki sammála en ég ætla ekkert að gera það. Ég rölti bara ánægð minn trúarveg.

Sumar og sól í sinni

Þó að sumardagurinn fyrsti hafi nú verið í gær óska ég ykkur bloggvinum mínum og öðrum gleðilegs sumars!

Föstudagurinn langi

Í dag er minnst þess besta sem Guð hefur og gat gert fyrir okkur mannfólkið. Hann setti sinn eigin son á kross til að færa hinstu fórn.

Það liggur mestu gagnrýnendum trúar á vörum hið ógeðfelda orð mannafórn um þennan táknræna atburð. Og að Guð geti ekki verið góður þegar hann drepur eina son sinn. Það er rétt ef horft er á þetta svona, nema Sonurinn var bara dáinn í þrjá daga og reis svo upp frá dauðum og er bráðlifandi enn þann dag í dag. En það þýðir lítið að reyna að segja það því að þá er manni sagt að maður trúi á skáldsögu. 

Svo eru það þessir rugludallar sem láta krossfesta sig á Filipseyjum, og ég spyr hvaða gagn það á að gera? Þó að Jesús hafi gengist undir þessar píningar fyrir okkur þýðir það ekki að við þurfum að apa það upp því að það er liðið og á að vera liðið. Það er einhver þáttur, þessi krossdýrkun kaþólikka, þeir með sína róðukrossa.

Þetta er sannarlega máttug gjöf sem okkur var færð og okkur ber að þakka hana því að hún leysir okkur undan þeim klöfum sem gyðingarnir þurftu að undirgangast til að vera með Drottni. Bæði sem Guð setti sjálfur og ekki síður öllum mannasetningunum sem var bætt við. Guð er eins og hvert annað gott foreldri sem gerir hvað sem er til bjargar börnum sínum. Þarna setti hann sjálfan sig í mannsmynd og dó, nema hann lifir og nú einnig í Jesú.

                        Gleðilega páska kæru bloggvinir og aðrir lesendur.

 

 

Dyrnar hans Guðs

Nú bíð ég spennt eftir að sjá hvort Guð sé með nokkuð í gangi fyrir mig. Það er svo auðvelt að trúa því að Drottinn sé að gera eitthvað sérstakt fyrir mann þegar einhver undur og stórmerki virðast vera að gerast, en ég vil nú frekar hafa fyrirvara á mér við þannig aðstæður. En það er samt staðreynd að Guð opnar og lokar þeim dyrum sem hann ætlar sér.

Það er ekki alltaf auðvelt að koma auga á verk hans því að þau láta oftar en ekki lítið á sér bera og hann bara svona læðir þeim rólega að. Það er mín bjargfasta trú að ekkert gerist án ástæðu og ég hef margt að þakka fyrir. Guð er undursamlegur lífsförunautur.

Blogg um ekki neitt

Ég er með allt of margar hugmyndir af bloggi en tekst ekki að útfæra þær. Ég vil samt láta vita af mér og setja eitthvað inn, þó að ekki sé það gáfulegt.  Ég nenni ekki að furða mig um of á fárinu í kring um hana Jade heitna, þó að ég sjái ekkert athugavert við þessa viðleitni hennar að sjá börnum sínum fyrir fjárhagslegu öryggi. En þessi ónáttúrulegi áhugi fólks á lífi hennar og bara frægu fólki almennt, það er ekki eins skiljanlegt. Það er margt í henni furðuveröld sem erfitt er að skilja. 

 

 

 

Hugleiðingar

Ég var að lesa Dean Koontz um daginn, Óttist eigi og Gríptu nóttina. Ég er ennþá að reyna að ákveða hvort þetta er snilld eða rugl, þó að vissulega leynist þar beitt samfélagsríni sem endranær. Og maður fer að spyrja sig hvað er verið að gera í neðanjarðarbyrgjum um heim allan. Það leiðir hugann að samsæriskenningum og hvað til er í þeim.

Ég hef verið að hugleiða þetta og komst að þeirri niðurstöðu að þrátt fyrir netið með allt sitt upplýsingaflæði, að mannkyn er sennilega jafn lítið nær því sem er raunverulega að gerast. Vandinn við netið er að það er ekki allt satt sem stendur þar. Það er auðveldara að dreyfa röngum upplýsingum en það var. 

Það eru þungar undiröldur að bylta sér núna, það er greinilegt á öllu að hið almenna siðferði er á hröðu undanhaldi og það eru stórir eiginhagsmunaaðilar sem vilja breytingar. Það er hins vegar alltaf einn hlutur sem ekki breytist og er alltaf bjarg til að byggja á. Drottinn hefur ekki breytt neinu og hann mun ekki gera. Það er huggun á þessum umrótatímum að það er þarna bjarg sem óhætt er byggja hús sitt á. 

Örflokkur í úlfaldamynd

Það er stundum talað um að gera úlfalda úr mýflugu þegar mál eru mikluð um of (hef gert það sjálf sko). Þetta er framsókn að reyna núna. Skrifa framsókn með litlum stöfum af því að þeir eru svo litlir (mættu vera til minni stafir). Hvort á maður að hlæja eða gráta núna þegar þessi eiturgræni skítaflokkur ætlar að hafa áhrif á gang mála? Ekki það að ég er enginn sérstakur aðdáandi VG og hvað þá Samfó, en það eru þó smá líkur á að einhverjar breytingar verði.

Það er líka komin kenning um það að framsókn vilji í minnihlutastjórn með sjöllum, hefur maður heyrt það betra Ætla menn ekki að læra? Dettur þeim í hug að allir bara taki því þegjandi og hljóðalaust eftir öll lætin undanfarið, þeir hafa ekkert séð enn á þeim vettfangi. Þetta er hneyksli að á þessum erfiðu tímum ætli þetta skítapakk sem hefur ráðskast með eignir þjóðarinnar að voga sér að standa í valdabrölti. Þessu liði er sama um þjóð sína, það eina sem það sér og sækist eftir eru völd til að fá tíma til að fela spillingarferil sinn.

Ég verð sjóðheit af bræði að hugsa um þetta og hugsa um þessa menn í þessum flokkum sem hafa í öll þessi ár notað umboð sitt til að hlaða undir sig og sína. Þetta kemur mesta friðsemdarfólki til að já, sjóða af bræði. Það er hægt að setja sig í spor þeirra sem störtuðu frönsku byltingunni, þó að sú bylting hafi því miður étið börnin sín. En bara að horfa upp á þetta óréttlæti að þessir menn hafa farið með alla þessa fjármuni úr landi, eiga að komast upp með það og við eigum að borga. Sem betur fer er Drottinn með almennig en á móti þeim gráðugu, verði hans vilji.

Litið yfir farinn veg

Ég hef verið að líta yfir farinn veg á blogginu mínu og verið að skoða aftur til haustsins 06 þegar ég byrjaði. Las ekki allar færslur og enn síður athugasemdir, en mikið þykir mér vænt um allar þessar hlýlegu athugasemdir sem bæði bloggvinir og aðrir hafa skilið eftir Ég sé einnig hvað mér hefur farið aftur að svara athugasemdum og skal játa upp á mig durtshátt að hafa ekki í það minnsta þakkað fyrir þær.

Svona er þetta bara, ég er víst enginn ofurbloggari. Svo hef ég ekki fengið neinn innblástur eins og ég þarf eiginlega ef eitthvað alvöru vit á að vera. Guð virðist kveikja og slökkva á því eftir þörfum. Það er mest til að koma boðskap Drottins á framfæri sem ég er með þetta blogg og það er auðveldara ef Guð sjálfur leggur mér lið. Sjáum hvað setur á nýju ári. 

Áramót

Jæja nú er bara síðasti dagur ársins upp runninn. Ég er ekki mikil áramótamanneskja og finnst þetta dálítið dapurleg tímamót, sem tekur út þegar ég heyri Nú árið er liðið. Víst er allavega að þessi áramót marka dapurleg tímamót fyrir þá sem sjá ekki fram á atvinnu og nægar tekjur á nýju ári. Þjóðfélagið er breytt og það ekki til batnaðar. En það er alltaf ljós í myrkrinu, Drottinn Jesú sem sannarlega tekur málstað þeirra sem eiga undir högg að sækja. Þegar myrkar hugsanir ásækja þá er gott að teygja sig í þetta ljós og það þarf ekki að teygja sig langt heldur. 

Ég óska ykkur bloggvinum mínum og öðrum sem lesa gleðilegs nýs árs og þakkir fyrir skemmtilegt ár. Megi Guð lýsa ykkur á nýjú ári

Jólakveðjur

Jæja Þorláksmessan upp runnin einu sinni enn. Ég segi stundum, það verða komin jól áður en maður veit af og það er alltaf raunin Mér finnst ekkert svo langt síðan ég var að taka niður skrautið síðast og nú fer ég að setja það upp aftur í kvöld. Ég vona bara að allir muni njóta Þorláksins og skötunnar, þeir sem borða það, ég er ekki ein af þeim samt.

Ég óska ykkur bloggvinum mínum og öðrum lesendum gleðilegra jóla og friðar í hjarta um hátíðirnar